За претседателските избори ќе се потрошат 4 милиони евра народни пари
24.09.2013 Утрински
Гласањето на дијаспората за претседател го поскапи речиси двојно изборниот процесПеттите претседателски избори, што треба да се одржат напролет следната година, ќе ја чинат државата четири милиони евра. Толку пари за оваа намена се предвидени во предлог-буџетот за 2014 година, пуштен во собраниска процедура.
Проекцијата за изборниот буџет е, можеби, единствената позната работа досега за изборите што треба да се одржат за околу половина година. Најрелевантните политички партии се' уште не ги соопштуваат јавно своите фаворити, така што не се знае дали актуелниот претседател ќе бара втор мандат и колку кандидати ќе влезат во натпревар за позицијата што е формално сместена на врвот на државната хиерархија. Нема ниту навестување за темите што ќе доминираат во кампањата што претстои.
Овие претседателските избори ќе бидат речиси двојно поскапи од локалните што се одржаа во март годинава, а за кои беа одделени од буџетот околу 2,25 милиони евра. Станува збор за два различни изборни циклуси, чија допирна точка е гласањето во два круга, кое подразбира дополнителни трошоци. Но, овој пат, гласањето на дијаспората уште повеќе ја крена цената на изборите за шеф на државата.
Напролет идната година, нашите иселеници ќе имаат премиерно можност да учествуваат на избори за претседател на Македонија. Домашната изборна администрација нема досега искуство со вакво гласање - во два круга надвор од границите на државата.
Иселениците имаа прв пат право на глас на предвремените парламентарни избори во 2011 година, кои се изведоа надвор од Македонија според мнозински модел и во три изборни единици - Европа и Африка; Северна и Јужна Америка; и Австралија и Азија. Ова гласање го карактеризираше многу низок одѕив, поради што, во политичките кругови се' уште се проблематизира легитимитетот на тројцата избрани пратеници.
На претседателски избори државата е една изборна единица. Поради тоа, политичките процени се дека учеството на иселениците, во зависност од процентот на нивниот одѕив, може дополнително да ги крене и онака високите прагови за избор на шеф на државата.
Според Уставот, изборите за претседател се одржуваат во последните шеесет дена од мандатот на претходниот претседател. Ѓорге Иванов ја презема претседателската функција на 12 мај 2009 година.
„Поскапувањето“ на изборите ја зголеми значително и буџетската ставка за Државната изборна комисија за 2014, во споредба со оваа година. Иако и двете години беа изборни, за годинава ДИК доби околу 3,2 милиони евра од буџетот, а за следната година се предвидени речиси пет милиони евра за оваа институција.
Од друга страна, идниот претседател, што ќе биде инаугуриран во мај следната година, ќе располага со помалку средства, во споредба со парите што од буџетот ги доби актуелниот претседател Иванов, за последната година од неговиот мандат. Од државниот буџет за 2014, предвидени се близу 1,2 милион денари за шефот на државата, додека за минатата година таа ставка изнесуваше речиси 1,5 милион денари.